Сімвалы памяціі прыгажосці

У мінскім парку Пісьменнікаў каля Нацыянальнай бібліятэкі Беларусі заклалі новую рабінавую алею. Экалагічная акцыя, якая аб’яднала літаратараў, кіраўніцтва бібліятэкі, ветэранскія арганізацыі і студэнцкую моладзь, была прымеркавана да Года беларускай жанчыны.

Асабліва глыбокае значэнне гэтай падзеі надала перадгісторыя стварэння алеі. Як расказала «БЛГ» намеснік старшыні Саюза пісьменнікаў Беларусі, вядомая пісьменніца і журналістка Алена Стэльмах, з’яўленне рабінавай алеі было даўняй марай і запаветным жаданнем Мікалая Чаргінца — заснавальніка і натхняльніка гэтага парка. Вядомы пісьменнік пайшоў з жыцця летам 2026 года, і высадка маладых дрэў стала данінай памяці яго працы і творчай спадчыне.
Рабіна традыцыйна сімвалізуе жаночую стойкасць і прыгажосць. Новыя дрэвы стануць важнай часткай зялёнай зоны, якая развіваецца з лістапада 2017-га. Кожны год тутэйшы фонд прырастае новымі памятнымі пасадкамі ў гонар класікаў айчыннага пісьменства (напрыклад, Янкі Маўра) і ў знак сяброўства з замежнымі калегамі. Гэтым азам у пасадцы прыняў удзел народны пісьменнік Башкартастана Марсель Салімаў.

— Нядаўна па ўсёй краіне прайшла маштабная акцыя па аднаўленні лясоў, і мы таксама вырашылі правесці падобную акцыю, толькі замест лесу выса­дзілі алею, — адзначыла Алена Стэльмах. — Кожнае дрэва, пасаджанае тут, мае глыбокі метафарычны сэнс. Іх магутныя карані — гэта глыбокія традыцыі беларускай літаратуры, а шумныя кроны — жывое слова сучасных аўтараў і іх нашчадкаў.

У планах творчага саюза — далейшае добраўпарадкаванне тэрыторыі, устаноўка памятных знакаў, скульптурных кампазіцый і будаўніцтва альтанкі.

Сяргей СТОЛЯР
Фота аўтара